header image  
Cystadleuaeth

Newyddion Diweddaraf

Tri cyfansoddiad jazz, tri cerddor a thair ffilm

Dydd Mercher Ebrill 18 2012

Triptych Jazz & Ffilm

Cyfansoddwr: Jochen Eisentraut

Cerddoriaeth: Jochen Eisentraut Trio, Ffilm: Eilir Pierce

Mae’r cyfansoddwr cymeradwyol a’r cerddor jazz, Jochen Eisentraut wedi ymuno gyda gwnethurwr ffilm heb ei ail, Eilir Pierce i greu prosiect cerddoriaeth a ffilm gyffrous. Mae Triptych Jazz & Ffilm, sydd i’w weld yn y Galeri, Caernarfon nos Sul 13 Mai 2012, wedi’i saernïo o gwmpas y rhif tri, gan gymryd syniad y triptych sydd mewn triawd o baentiadau allor canoloesol. Ceir îs-thema hefyd yn archiwlio perthynas rhwng parhauster a byrhoedledd, mewn cerddoriaeth, tirwedd a diwylliant.

Yn byw yn Nhregarth ger Bethesda, mae Eisentraut yn bianydd/sacsaffonydd jazz hynod ac yn ddarlithydd rhan amser yn Ysgol Gerddoriaeth, Prifysgol Bangor. Yn ei bortffolio, ceir amrywiaeth eang o gyfansoddiadau ar gyfer ffilmiau a dramau yn cynnwys cerddoriaeth y ddrama sebon boblogaidd S4C, Rownd a Rownd.

Hefyd yn byw’n Bethesda, mae gan y gwneuthurwr ffilm annibynnol, Pierce drac-record deniadol o ffilmiau sy’n profocio’r sgrîn gyda’i steil weledol gwahanol. O fewn y prosiect hwn, ceir cyfuniad o gerddoriaeth a delweddau yn chwilota’r hyn sy’n barhaus mewn tirwedd, iaith a cherddoriaeth a mae’n eu cyfochri gyda newidiadau byw fel golau, tywydd, y natur ddynol a byrfyfyrio artistig.

Gosodir y cyfryngau newydd yn nghalon y prosiect atristig hwn hefyd. Wedi’r perfformiad byw, bydd ferswin lawn wedi’i recordio o Triptych Jazz & Ffilm ar gael i’w wylio ar YouTube a bydd modd prynu DVD o’r campwaith.

Yn ôl Eisentraut, “Mae dirywiad y cyfryngau traddodiadol fel y teledu, sinema a CD’s yn effeithio ar lawer agwedd o ddiwylliant a dyma enghraifft arall o sut mae nodwedd barhaol o’r bod dynol yn gallu cael ei drawsffurfio i mewn i rhywbeth amser byr.

“Mae YouTube bellach yn drosglwyddydd blaenaf ym myd cerddoriaeth a fideo, ac eto cathod yn dawnsio a babis yn brathu yw llawer o’i gynhwysiad. Mae Triptych Jazz & Ffilm yn hawlio’r cyfrwng yma ar gyfer deunydd o fath gwahanol.”

Dewch i brofi cerddoriaeth atmosfferig, byrfyfyrio anhygoel wedi’u cydblethu â delweddau symudol prydferth. Bydd hon yn noson hamddenol steil cabaret a bydd hefyd cyfle ecsgliwsif i glywed set gan Jochen Eisentraut Trio. Tocynnau yn £8/£7 ar gael o www.galeri.com.

Mae Triptych Jazz & Ffilm wedi’i ariannu gan Cyngor Celfyddydau Cymru.

Rho sylw

Dewch i weld dwy arddangosfa arbennig

Dydd Mawrth Ebrill 17 2012

Mae dwy arddangosfa newydd ar fin agor yn Amgueddfa ac Oriel Gwynedd Bangor. Bydd cyfle i weld gwaith newydd gan yr arlunydd Andrew Smith a’r dylunydd Ann Catrin Evans rhwng 21 Ebrill a 9 Mehefin. Bydd yr arddangosfa yn cael ei agor yn swyddogol gan Mike Knowles.

Arddangosfa o baentiadau newydd gan Andrew Smith yw ‘Ar Ymyl Lliw’, i gyd wedi cael eu cynhyrchu yn ei stiwdio yn Harlech, ble mae golau plyg Bae Tremadog yn llifo drwy’r ffenestri yn rhoi bywyd i’r gofod tu mewn ac yn dylanwadu ar ei ymchwil i liw.

Mae Andrew wedi gweithio efo lliw yn gyson am dros ugain mlynedd, gan ymchwilio i wahanol brosesau a dulliau, yn cynnwys gwneud printiau (The Surface of Colour 2001); cydweithio ar sefydlu cysylltiadau â phartneriaid rhyngwladol (Galicia 2002, Macedonia 2003, Mecsico 2004, Gwlad Pwyl 2004 ac Awstralia 2009) a phrosiectau celf gyhoeddus (Y Barri 2009, Caerdydd 2010 a Rwsia 2011). Dyma arddangosfa gyntaf Andrew yng Nghymru ers En Route yn Oriel Davies Gallery yn 2007.

Meddai Andrew am ei waith newydd: “Dros amser, mae’r broses o wneud lluniau wedi arwain at liw fel yr unig wir gyfeiriad i mi ar gyfer paentio. Wrth ystyried llun a lliw, mae ymylon y lliw yn diffinio paramedr y ddelwedd a thrwy anghysondeb greddfol, mae’n tynnu’r amgylchedd allanol i mewn i’r paentiad. Mae ansawdd y lliw yn rhyngweithio â’r ddelwedd ynghyd â’r strwythur.”

Mae Ann Catrin Evans yn ddylunydd gwneuthurwr 3D metel. Mae’n adnabyddus yn genedlaethol a rhyngwladol am ei Dodrefn Drysau unigryw ac am ei Cherfluniau Cyhoeddus.

Mae’r arddangosfa hon i gyd yn waith newydd o weiren haearn, ychydig yn fwy ysgafn a bregus na’i gwaith blaenorol. Mae gwaith haniaethol a thirlun mawr o weiren wedi eu fframio, darluniau copr lliwgar wedi eu boglynnu, llestr a phlatiau cywrain a gemwaith cain.

Ers graddio mewn Dylunio 3D mae Ann wedi cwblhau nifer sylweddol o gomisiynnau mewn amryw ddeunydd, wedi casglu amryw wobr ac mae ei gwaith wedi ymddangos mewn nifer o arddangosfeydd pwysig adref a dramor.

Yn 2011 dyluniodd Ann waith celf ar gyfer Llys Dafydd yr amffitheatr awyr agored ym Methesda gan gynnwys rheiliau a giât, cerflun Y Chwarelwr mewn dur corten a dyluniadau wedi eu cerfio ar lechen yn seiliedig ar Cerfiadau Traddodiadol Dyffryn Ogwen gan Gwenno Caffell.

Dywedodd Delyth Gordon, Swyddog Celf Weledol Cyngor Gwynedd: “Rydym yn falch iawn o lwyfannu dwy arddangosfa sy’n cyflwyno gwaith newydd gan Andrew Smith ac Ann Catrin Evans. Mae cydbwysedd a dylunio yn cael sylw cyson yng ngwaith y ddau artist yma. Mae’r arddangosfeydd yn eu tro yn cyflwyno i’r ymwelydd feiddgarwch deinamig lliw gan Andrew a chryfder a sensitifrwydd ffurf gan Ann.”

Mae’r oriel ar agor i’r cyhoedd: dydd Mawrth – Gwener 12:30 – 4.30, dydd Sadwrn 10:30 – 4:30, ac mae mynediad am ddim. Am fwy o wybodaeth ynglŷn â’r arddangosfa, cysylltwch ag Amgueddfa ac Oriel Gwynedd, Bangor 01248 353368 neu ewch i www.gwynedd.gov.uk/amgueddfeydd

Rho sylw

Arddangosfa Gwaith Celf Cyfranogwyr Celf mewn Iechyd a Lles

Dydd Mercher Ebrill 4 2012

Hyd Mai 13eg yn Oriel Plas Glyn y Weddw bydd modd gweld gwaith celf cyfranogwyr gweithdai celf mewn iechyd a llesa gafod ei gynnal gyda’r tiwtor celf Tess Urbanska.

Mae’r gwaith sydd i’w weld yn ganlyniad o 10 sesiwn o weithdai dwy awr dros gyfnod o ddeg wythnos gyda’u tiwtor, yr artist Tess Urbanska. Ariannwyd y sesiynau gan Ynys Môn a Gwynedd Mind a’r Uned Gelfyddydau Cymunedol yng Nghyngor Gwynedd. Pwrpas y sesiynau oedd hybu iechyd a lles drwy ddefnyddio’r cyfwng celf.

Dywedodd y tiwtor ei bod yn “teimlo yn ffodus iawn i fod yn rhan o’r prosiect hwn, ac fel artist fy hun, rwyf wedi mwynhau cyfarfod gyda meddyliau creadigol eraill a threulio amser mewn ystafell yn llawn ‘buzz’. Mae wedi bod yn brofiad positif a gwerth chweil i mi ac mae hynny yn bennaf oherwydd y grŵp”.

Bydd y casgliad o’r gwaith i’w weld yno hyd Mai 13eg, am fwy o wybodaeth am amseroedd agor yr oriel cliciwch yma.

Rho sylw

Harlech 394

Dydd Mawrth Ebrill 3 2012

Yn dilyn llwyddiant prosiect ysgrifennu cymunedol Chwedlau’r Ddraig y llynedd, mae Cytser wedi ymuno a Cadw, sef ceidwad castelli Cymru i greu prosiect ysgrifennu newydd wedi eu hysbrydoli gan Gastell Harlech. Gwahoddwyd disgyblion Ysgol Tan Castell, Harlech i gymryd rhan yn ‘Harlech 394’. Rhoddwyd yr enw 394 oherwydd mai dyma’r nifer o weithwyr medrus a adeiladodd y castell, a hefyd yr uchafswm o eiriau bydd y disgyblion yn cael defnyddio i ysgrifennu eu storiâu newydd.

Dydd Gwener ddiwethaf, cafodd y disgyblion gwmni gan yr artist a’r hanesydd Sean Harris, i archwilio’r castell o bersbectif newydd, nid yn unig gan ddefnyddio eu llygaid, ond hefyd eu dwylo, clustiau a’u dychymyg i ddod a hanes anghredadwy’r castell yn ôl yn fyw! Yn ystod y ddau fis nesaf, bydd y disgyblion yn gweithio gyda’r awdures a’r storïwr poblogaidd Cath Aran i ddatblygu ac ysgrifennu eu storiâu a fydd yn cael eu hysbrydoli gan holl ddarnau’r castell, yr hanes a’r dyfodol.

Bydd y storïau yn cael eu hargraffu yn ddwyieithog ac yn cael eu cyflwyno mewn lansiad llyfr swyddogol yng Nghastell Harlech fel rhan o’r digwyddiad llenyddol ‘Harlech Chapters’ diwedd Mai.

Rho sylw

Gweithdai Celf Sain arbennig

Dydd Mercher Mawrth 28 2012

Yn ystod gwyliau’r Pasg mis Ebrill bydd gweithdy ‘Celf Sain’ arbennig yn cael ei gynnal fel rhan o brosiect ehangach Crochan a Ffwrnais ar gyfer yr Olympiad Diwylliannol.

Bydd cyfle i fyfyrwyr rhwng 14-19 oed fynychu’r rhaglen pedwar diwrnod – sy’n rhad ac am ddim, ar 2, 3, 4, 5 Ebrill yn Galeri, Caernarfon.

Dan arweiniad y cyfansoddwr Ed Wright bydd y gweithdai yn rhoi cyfle i’r myfyrwyr gyfansoddi cerddoriaeth electronig, ei chwarae’n fyrfyfyr a’i berfformio. Bydd y darn terfynol o gerddoriaeth yn cael ei berfformio yng Nghastell Caernarfon fel rhan o’r digwyddiad Cipio’r Castell sy’n rhan o gynllun ehangach Crochan a Ffwrnais ar 1 Gorffennaf.

Mae’r Olympiaid Diwylliannol yn gyfle i ddathlu doniau creadigol ac artistig Gwynedd, ac mae’r digwyddiad Cipio’r Castell yng Nghaernarfon yn rhan o’r cynllun hwn. Ar 1 Orffennaf bydd cannoedd o blant o ysgolion lleol yn ymgynnull ar faes y dref i drawsnewid y castell yn arddangosfa enfawr ar gyfer eu creadigaethau a’u cerddoriaeth.

Trwy gydol mis Mehefin bydd y gwaith y gweithdai celf, yn cael eu harddangos, gan gynnwys graffiti, gweithiau sain, caleidosgopau, tîpis, animeiddio a chlipiau fideo.

Dywedodd Gwawr Wyn Roberts, Swyddog Datblygu Celfyddydau Cymunedol Cyngor Gwynedd:

“Mae’r misoedd nesaf yn mynd i fod yn rhai cyffrous iawn i’r celfyddydau yng Ngwynedd. Mae’r gweithdai hyn yn cynnig cyfle i ni ddathlu hanes, diwylliant a hunaniaeth Gwynedd mewn ffordd fodern a chyffrous.

“Mae’r gweithdy yn gyfle gwych i bobl ifanc Gwynedd fod yn rhan o’r digwyddiad cenedlaethol hwn, sydd eisoes wedi gweld 16 miliwn o bobl ledled Prydain yn cymryd rhan.”

I archebu lle ffoniwch Ganolfan Gerdd William Mathias ar 01286 685230

Am fwy o wybodaeth, a manylion am docynnau i’r digwyddiad Cipio’r Castell galwch heibio i Ganolfan Groeso Caernarfon, ffôn 01286 672232 neu ewch i www.ymweldageryri.info

Rho sylw

Celfyddyd mewn Iechyd a Lles

Dydd Mawrth Mawrth 27 2012

Dydd Gwener yma, 30ain o Fawrth, bydd Cyfarfod Cyffredinol Blynyddol Creu Iechyd yn cael ei gynnal yn Oriel Ynys Môn, Llangefni. Creu Iechyd yw’r Grŵp Llywio ar gyfer y Celfyddydau mewn Iechyd a Lles i Wynedd a Môn.

Mae’n gyfle i ddod ag artistiaid ac ymarferwyr maes gofal iechyd ynghyd yn ogystal ag ethol aelodau newydd, mwynhau cyflwyniadau byr, i rwydweithio ac i leisio barn.

Yn siaradwyr gwadd eleni bydd Pauline Down – Cerdd Mewn Iechyd, Alys Conran a Jill Teague – Ysgrifennu mewn Iechyd a  Gareth Foulkes – Disability Arts Cymru.

Mae’n ddigwyddiad rhad ac am ddim a mae croeso cynnes i bawb, i gofrestru neu am fwy o wybodaeth cysylltwch â Gwawr Wyn Roberts, ysgrifennydd y grŵp drwy e-bost GwawrR@gwynedd.gov.uk neu gan ffonio 01286 679721 / 07789 032517.

Rho sylw

Spyd ar y Soffa

Dydd Iau Mawrth 22 2012

Bu i sioe lwyddiannus Spyd ar y Soffa gyda Siw Hughes a Dylan Rhys deithio rhai o Ysgolion Gwynedd yn ystod pythefnos olaf Mawrth eleni.

Cynilo arian ydi thema Spyd ar y Soffa a’r stori yn cylchdroi o gwmpas Spyd, a’i uchelgais i fynd rownd yn Byd mewn roced! Problem Spyd ydi diffyg arian , felly mae Anti Isa yn mynd ati i ddysgu Spyd sut i gynilo ac arbed arian, a hynny drwy adrodd straeon a darllen llyfrau. Llwydda i ddarbwyllo Spyd mai’r ffordd orau i gynilo arian yw ennill arian yn onest a’i gadw mewn cadw – mi – gei.

‘Mi roedd y sioe yn wych!’ meddai un merch o Ysgol Crud y Werin yn Aberdaron ar ddechrau’r daith. A run negas a glywyd gydol y daith.

Ariannwyd y sioe gan Teuluoedd yn Gyntaf a cynhyrchwyd y sioe gan y

Gwasanaeth Llyfrgell Gwynedd.

Os am fwy o fanylion am y sioe Spyd ar y Soffa neu Hyrwyddo Llenyddiaeth yng Ngwynedd cysylltwch â Gwen Lasarus Hyrwyddwr Llenyddiaeth Gwynedd, Llyfrgell Caernarfon, Lon Pafiliwn, Caernarfon, Gwynedd, LL55 1AS, 01286 679465 / GwenLasarus@gwynedd.gov.uk

Rho sylw

Pesda Roc Bach

Dydd Iau Mawrth 22 2012

Penwythnos Pasg, 4 -8 Ebrill

Neuadd Ogwen, Bethesda.

Mae’n bleser cyhoeddi bod gŵyl fach yn dychwelyd i Ddyffryn Ogwen, sef Pesda Roc Bach 2012. Bydd amrywiaeth helaeth o gerddoriaeth a digwyddiadau ar y nosweithiau hyn a rhywbeth at ddant pawb. Ar ddechrau’r ŵyl bydd dangosiad arbennig o’r ffilm Separado! Yn y ffilm bydd Gruff Rhys (Super Furry Animals) yn ein tywys ar wibdaith ar draws sawl cyfandir i ddarganfod ewythr colledig ym Mhatagonia- y gitarydd mewn poncho, Rene Griffiths. Mae’r Guardian yn disgrifio’r ffilm fel, ‘Eccentrically charming documentary’. Bydd Rene Griffiths, seren y ffilm yn perfformio ar y noson yn Neuadd Ogwen. Ymysg y rhai sy’n perfformio mae 9bach, band gwerin lleol sydd newydd ddod nôl o fod ar daith yn Awstralia. Dywedodd Martin o 9bach, “Rwy’n edrych ymlaen at weld Separado gan fy mod wedi clywed gymaint amdano ond heb ei weld. Hefyd bydd Georgia Ruth yn chwarae gyda Cowbois Rhos Botwnnog yn werth ei gweld. Mae cael Heather Jones yn canu gyda ni yn anrhydedd mawr. Mae’n adeg cyffrous iawn i ni gan y byddwn yn perfformio rhai caneuon newydd o’n hail albwm am y tro cyntaf”. Heather Jones yw cantores werin amlycaf Cymru ers ei llwyddiannau cyntaf yn y ‘60au. Mae hi’n parhau i fod yn flaengar yn y sîn cerddoriaeth werin Cymraeg a Saesneg.

Bydd Cowbois yn rhyddhau eu halbwm newydd, ‘Draw Dros y Mynydd’ yn y misoedd nesaf a byddant yn chwarae fel band Georgia Ruth yn ogystal â’u set eu hunain. Mae hi wedi rhyddhau ei EP cyntaf yn ddiweddar, ‘In Luna.’ Mae Mr Huw hefyd yn rhyddhau EP newydd, ‘Yr Afiechydon’, a fydd ar werth ar y noson. Bydd noson hefyd yng nghwmni Elin Fflur, mae perfformiadau angerddol a llais y gantores o Fôn wedi syfrdanu cynulleidfaoedd led-led Cymru a thu hwnt. Meddai Dilwyn Llwyd, un o drefnwyr yr ŵyl, “Mae’r ŵyl hon yn estyniad naturiol o’r nosweithiau bach clyd sydd wedi bod yn digwydd yn fisol yn Pesda. Cerddoriaeth yw canolbwynt y nosweithiau.” Mae’r tocynnau ar gyfer yr holl nosweithiau hyn ar gael yn awr o Siop Kath, Pesda ac o www.sadwrn.com. Fe fydd bar a bwyd ar gael yn Neuadd Ogwen ac mae croeso cynnes i bawb. Mae pob noson yn cychwyn am 7 ac mae tocynnau yn £5 o flaen llaw neu £7 ar y drws.

Dyma’r prif ddigwyddiadau:

Continue reading →

Rho sylw

Antur yn gyntaf …

Dydd Mercher Mawrth 21 2012

Photernative Wales

Ffotograffwyr arbrofol, sy’n plygu golau mewn ffyrdd anghyffredin!

Mae Photernative Wales yn grŵp o artistiaid-ffotograffwyr a ddaw o ledled gogledd Cymru sy’n credu nad y datblygiadau diweddaraf yw popeth mewn ffotograffiaeth. Maent yn angerddol am ganfod posibiliadau creadigol prosesau ffotograffig o bob math, ac yn aml, maent yn addasu camerâu neu’n dyfeisio rhai newydd er mwyn cyflawni’r nod. O 23 Mawrth hyd 6 Mai 2012, mae’r arddangosfa newydd hon ‘Antur yn gyntaf…’ yn Oriel Pendeitsh, Caernarfon, yn dod â gwaith 19 aelod y grŵp ynghyd.

Wrth ymchwilio i’r posibiliadau creadigol gan ddefnyddio prosesau ffotograffig arbrofol ac amgen, o gamerâu twll pin i palladium, syanoteip i ddu a gwyn, vintage, tegan a rhai maent wedi’u creu eu hunain, maent oll yn cyfrannu at greu delweddau diddorol iawn.

Meddai Delyth Gordon, Swyddog Celf Weledol, Cyngor Gwynedd “Rydym yn falch iawn o lwyfannu’r arddangosfa newydd hon yn Oriel Pendeitsh. Yn yr oes hon o gael canlyniadau awtomatig ac ar unwaith wrth bwyso botwm, gobeithio y bydd y gwyliwr yn cael ei swyno gan yr amrywiaeth o themâu, syniadau a thechnegau a arddangosir drwy hud ‘plygu golau’”

Sefydlwyd y grŵp yn 2010 ac mae’n darparu cyfleoedd arddangos rheolaidd i aelodau, gyda rhai aelodau yn gallu cynnig sesiynau gweithdy yn y gymuned drwy drefniant.

yn arddangos mae :

David McBride

Sonja Benskin Mescher

David Makin

Vivienne Rickman-Poole

Alison McLean

Ben Du Ros

Tim Pugh

Wendy Dawson

Chris Bird

Gill Bird

Ian Thompson

Gareth Hobson

Caroline Race

John Clarke

Sue Clarke

Susie Liddle

Chloe Rafferty

Alan Whitfield

Antonia Dewhurst

I gael mwy o wybodaeth am Photernative ewch draw i:

www.photernative.posterous.com

Oriel Pendeitsh, Caernarfon

23 Mawrth – 6 Mai 2012

Ar agor ddydd Llun i ddydd Sadwrn, 10.00 – 3.30 / o 2 Ebrill, ar agor ddydd Llun i ddydd Sul, 9.30 – 4.00

01286 676 476 / 01286 679 564

Rho sylw

Premiere Cymru o Y Goedwig

Dydd Llun Mawrth 19 2012

Rhwng 29 a 31 o Fawrth bydd cyfle i weld darn theatr heb eiriau Fevered Sleep / Fuel yn cyflwyno Y Goedwig / The Forest yn y Galeri yng Nghaernarfon.

Mae ‘na lecyn yng nghalon y goedwig. Llecyn yw hwn lle nad yw pob dim fel mae’n ymddangos. Mae pobl yn troi’n anifeiliaid, adar yn gerddoriaeth, diwrnod yn nos dail yn oleuni. Mae o’ch cwmpas ymhob man. Mae’n llawn antur ac yn newid drwy’r amser. Y goedwig yw’r fan hon.

“Celfydd…..mae fel breuddwyd am noson mewn coedwig. Mae ‘na osgeiddrwydd i’r cynhyrchiad hwn a afaelodd yn fy nychymyg ân emosiynau” The Times ****.

Darn theatr heb iaith.

£5 am fwy o fanylion cliciwch yma.

Rho sylw