Croeso i wefan Gwynedd Greadigol…
Dyma ganolbwynt gwybodaeth, newyddion a chyfleoedd ym maes y celfyddydau i Wynedd. Gwefan ‘dan ofalaeth Fforwm Celfyddydau Gwynedd yw hon sy’n derbyn cefnogaeth a mewnbwn gan Uned Celfyddydau Cymunedol, Cyngor Gwynedd. Mae croeso i chi gysylltu â ni i rannu manylion eich gweithgareddau, rhowch wybod i ni am ddigwyddiadau creadigol yr ydych yn eu trefnu ac fe allwn eu hysbysebu yma i chi. Cadwch lygad ar ein gwefan am y wybodaeth ddiweddaraf a dilynwch ni ar Facebook a Twitter.
Gwefan Newydd ar y Gweill!
Mae Fforwm Celfyddydau Gwynedd wedi apwyntio cwmni Delwedd o Gaernarfon (www.delwedd.co.uk) i gynllunio a chreu gwefan newydd. Mae’r cynllun presennol wedi bod gyda ni am sawl blwyddyn bellach a da ni’n teimlo ei bod bellach yn amser am edrychiad newydd! ‘Rydym yn gweithio’n glos â Delwedd ar y prosiect a fydd gobeithio wedi ei gwblhau yn ystod yr wythnosau nesaf. Os yr ydych yn artist neu’n ymwneud a’r celfyddydau yng Ngwynedd mae croeso i chi gysylltu â ni i drafod ffyrdd o gael eich cynnwys ar y safle ar ei newydd wedd.
Cynhadledd Llwyddiannus y Fforwm
“Creadigrwydd a’r Ifainc”
Cynhaliwyd cynhadledd lwyddiannus iawn ym mis Mawrth i rannu arferion da ym maes gweithio â phlant a phobl ifainc drwy gyfrwng y celfyddydau.
Cafwyd rhaglen lawn o siaradwyr gwadd gan gynnwys cynrychiolwyr o gynllun Ysgolion Heb Waliau o Caerfaddon ac o gynllun Plant y Cymoedd, De Cymru. Cafwyd adloniant gan fyfyrwyr o Adran Gerdd, Prifysgol Bangor a chelf fyw yn cael ei greu drwy gydol y diwrnod gan tair o fyfyrwraig celf o Coleg Menai.
Y prif themâu a godwyd yn ystod y trafodaethau oedd yr angen lleol am well dealltwriaeth a sgiliau o sut i werthuso ac i ymchwilio i effeithiau’r celfyddydau ar ein cyfranogwyr. Mae galw cynyddol i weithwyr sector y celfyddydau fesur effaith ein gweithgareddau yn sgil yr hinsawdd ariannol heriol yr ydym oll yn ei wynebu. Bydd Fforwm Celfyddydau Gwynedd yn ymdrechu i ymateb i’r galw yma gan edrych ar y posibiliadau o gefnogi hyfforddiant arbenigol yn y maes.
Thema bwysig arall a godwyd oedd yr angen am gyfleoedd i ymarferwyr celfyddydol ddod ynghyd i drafod ac adlewyrchu ar y gwaith a wneir. Bydd y Fforwm yn edrych i gydweithio a chynllun Plant y Cymoedd i ddatblygu rhwydwaith o ymarferwyr ar draws Cymru a all gefnogi a dysgu o’i gilydd.
Cafwyd hefyd ymateb positif iawn i’r model o weithio a gyflwynwyd gan gynllun Ysgolion Heb Waliau; gyda sawl corff yn mynegi diddordeb mewn mabwysiadu’r dull yma o weithio yma yng Ngwynedd. Bydd y Fforwm yn cydgordio cyfarfod i drafod y posibiliadau lleol yn y dyfodol agos. Rhowch wybod i ni os yr hoffech fod yn rhan o’r trafodaethau.
Y gynhadledd yma oedd y gyntaf i’r Fforwm ei chynnal ac wedi diwrnod llwyddiannus iawn, ac mewn ymateb i adborth a gasglwyd wedi’r digwyddiad byddwn yn cysidro trefnu digwyddiad tebyg eto yn y blynyddoedd nesaf.
Diolch i bawb a fu’n rhan o’r digwyddiad ac i bawb a fynychodd.